唔係過時過節，都一樣有大堆頭星級賀歲片陣容嘅電影睇，講緊嘅咪係有好兄弟佐治古尼（GeorgeClooney）、畢彼特（BradPitt）同麥廸文（MattDamon）齊齊歸隊嘅《盜海豪情13王牌》（Ocean'sThirteen），佢哋今次同其他瞞徒手足為咗情義，要進行不可能成功嘅高智復仇大計，喺3分半鐘內從阿爾柏仙奴（AlPacino）身上拎走五億美金，又睇下佢哋有乜把炮！ 撰文：戶川淳
聽日（6月7日）上映嘅《盜海豪情》第三集《13王牌》，繼續由金像導演史提芬蘇德堡（StevenSoderbergh）執導，最重要係監製謝利溫杜納（JerryWeintraub）幕後一手策劃，佢一聲令下成班檔期緊密嘅兄弟又齊齊去到拉斯維加斯埋位。
復仇第三部曲
今次雖然冇咗掛住生仔嘅茱莉亞羅拔絲（JuliaRoberts）同惡太嘉芙蓮薛達鍾斯（CatherineZeta-Jones），但多咗個好戲到爆嘅阿爾柏仙奴，佢仲做大奸角，真係增加唔少吸引力。
新一集講殺人唔眨眼嘅賭場老闆威利柏克（阿爾柏仙奴飾），出賣咗丹尼奧遜（佐治古尼飾）嘅恩師泰斯各（艾利諾高廸飾），令佢長期瞓醫院。奧遜一班瞞徒決定喺威利旗下賭場開幕嘅大喜日子，進行一次最無情、最高智嘅報復攻略─喺威利人生事業最高峯之際，用3分半鐘時間令佢傾家蕩產、名譽掃地兼夾自尊都冇埋。
麥廸文孭重飛
如果有追開《盜海》系列嘅，都應該記得第一集佐治古尼係全片嘅主角，佢為咗搶番個老婆，向情敵安廸加西亞（AndyGarcia）間賭場開刀；到第二集，安廸加西亞就進行大報復，反而畢彼特戲份最多，由佢施展美男計。今勻第三集，輪都輪到麥廸文孭重飛，不過話時話，又係玩美男計似乎冇乜新意喎！
今次麥廸文要媾阿爾柏仙奴嘅女助手，混入鑽石房偷鑽石，而安廸加西亞仲同11瞞徒化敵為友，成為第12張王牌，幫番佢哋轉頭添！
第三集嘅編劇搵嚟撰寫過《天才遊戲》（Rounders）嘅大衞利民（DavidLevien）同拜恩高柏文（BrianKoppelman），佢哋善寫關於賭博同牌局嘅故事，希望令睇過第二集好失望嘅影迷重拾信心啦！
話你知：三王扮嘢扮上癮
《盜海豪情》系列成日都係呃呃騙騙，扮鬼扮馬梗係唔少得，不過今集導演都玩得幾盡，花俏程度絕對拍得住《神探俏嬌娃》（Charlie'sAngels）。好似畢彼特為咗要呃阿爾柏仙奴，佢戴假髮同黐假鬚扮成地理學家，將偷拍器放喺佢辦公室。佐治古尼就扮成鬍鬚佬混入賭場賭錢，麥廸文就黐假鼻，着埋中山裝扮中國人有錢佬嘅助手媾女，真係騎呢到爆。
最令《盜海》迷驚喜嘅，係第二集有出現嘅法國神偷雲遜卡素（VincentCassel）今集會客串演出，佢竟然着住同密室幅牆圖案一樣嘅衫，為安廸加西亞偷鏈，場面十足《儍豹遇着烏SirSir》（PinkPanther），仲唔夠頂癮？