大馬主Ｙ報答恩師當年栽培，承諾捐款一億元畀中文大學，建立一間小型全宿新書院，收生三百人，書院以恩師為名，叫做「敬文書院」。馬主Ｙ喺科技事業發大財，回饋社會，報答恩師，十分值得尊敬。
有老友向大馬主Ｙ獻計，他日「敬文書院」落成，不如搵埋散佈全球嘅「朱仔」（即曾得朱敬文先生獎學金往美國讀書嘅香港學生），輪流返書院做義工，辦講座，講治學之道，社會奮鬥之術，令學生得益，甚至做埋mentor又點話！如果行得通，「朱仔」之中，有大教授，有大商家，有科技專才，喺大馬主Ｙ一聲號召之下，回港為學生輔導一個短時期，學生認真得米。
大馬主Ｙ做生意，兩路並進，佢嘅科技事業與網上電子遊戲開發事業，已經甚為穩定，於是進軍從來未有中國人做過嘅馬匹配種事業。呢個行頭，以愛爾蘭，澳洲，紐西蘭做得最先進，日本人用錢搭夠，搜購全球優秀馬公、馬乸，喺北海道配種，逐漸打入世界市場。馬主Ｙ專心買入「藍籌股」──即係曾經贏過一級大賽嘅種馬嘅股權，然後買入大量雌馬放喺紐西蘭嘅牧場，以雌馬配名馬，生出嚟嘅仔女是否一定得，冇人敢講，Danehill咁巴閉，都有子嗣唔掂，被掃出馬房啦。但名種馬嘅子女，贏馬嘅機率確係高好多。好似「好利威」、「喜利多」、「駕進」呢啲高班馬嘅父親係Towkay，喺香港嘅成績非常好。馬主Ｙ間公司於是買入Towkay嘅重要股權。
配馬事業，本錢大，回本年期唔肯定，係風險甚高嘅生意，故此以中國人咁精靈，咁識賺錢，都冇人願意投資。馬主Ｙ就唔同，早年冇錢放洋，得朱先生送佢去印第安納州，一落機就要搵兼職，供自己讀書，獲優異成績，再轉去長春藤讀名校UPenn，嗰份毅力十分驚人。有此鍛煉，馬主Ｙ相信憑知識，憑耐力，佢與一班股東可以追上日本人，成為世界上studbusiness一股主要力量。左丁山係標準馬迷，只識輸錢當捐輸，唔識深入研究賽馬事業，好希望馬主Ｙ迎頭趕上澳紐日。