有一陣子，私房菜開得如雨後春筍，所有都稱自己為私房菜，全部主理者背後都有一個蕩氣迴腸的故事，這位是清朝御廚的後代，那位是商賈巨富的家庭總廚，因為某些不足外人道的緣故流落凡間，能夠吃到他的手藝是食客莫大的福份與緣份，人物介紹一大輪但食物介紹欠奉，結果吃到的都是巧立名目，中加點西，日本加點意大利，法國加點盧旺達，古加點今，用砂煲盛芒果布甸，用仿清瓷器盛焗豬扒飯，更離奇的是以大作招徠，超級大條的養魚蒸得像塑膠，巨得像輻射射過的雪藏鮑切開來像月餅，更不要臉的是大加特加味精然後自稱絕對不含味精，食到脷都嚡埋，面都痹埋，口都歪埋。
自此對私房菜充滿戒心，尤其對Fusion聞之色變，廚藝博大精深，窮一生精力鑽研單一項地方菜式猶恐不足，年紀輕輕廚子便揚言已融會貫通世界各地烹調精髓，唔該唔好呃我膝頭哥唔食辣椒醬，一套羅漢拳尚且未打得好，基本功橫看豎看也未像樣，如何去練落英劍法與亁坤大挪移？監粗嚟也只會得到掩眼法，花枝招展一輪，呢樣嗰樣一番，當食物上枱，食客們將食物放入口中後得到一個你眼望我眼，口黑面黑心中暗叫一聲騙子，嘥人時間嘥人心機嘥人錢，一餐之後大家老死不相往還。這次為食友人相邀吃私房菜，只問了友人一句：「呢間私房菜食乜嘢㗎？」「廣東菜，正宗簡單屋企菜。」友人答。「正宗」、「簡單」、「屋企」正是我所追求的答案，故對這將要吃到的一餐非常期待。