因為要承擔賬目出錯,喺舊年2月宣布同盈科保險拜拜,辭去執行董事兼首席財務總監一職嘅張森(SamCheung),同李家二少講再見之後,原來轉投麗新發展岳少嘅懷抱,而且已經有成半年咁耐。噚日華華喺麗展份通告裏面,見到佢大名,先知佢已經喺舊年11月加盟麗展,做高級副總裁,啱啱喺6月1號做埋執行董事,除咗可以收酬金,仲可以參加購股權計劃。
即係話,舊年6月會計師公會決定唔向張森採取紀律處分後,佢跟住就轉投麗展。噚日華華同佢傾咗兩句,佢話喺麗展主要睇公司業務發展,但就唔管財務。
麗展同張森訂嘅董事合約,並冇固定服務期,而且一年內喺免付賠償(法定賠償)嘅情况下,公司可以終止有關合約──咁即係一年內隨時炒得,似乎有啲怪喎。之前,盈保同張森訂嘅董事合約,都講明兩年啦!相反,麗展同系嘅豐德麗,噚日都委任咗執行董事劉傑良,但人哋就有三年固定任期。
張永霖係紅娘?
張森年紀輕輕,43歲人履歷卻相當豐富,原來早喺2000年盈動(電盈前身)提出收購當時嘅老電時,佢已喺4月份過檔盈動,出任收購合併董事,02年初先加盟盈保;之前又至少喺三家投資銀行做過。
究竟張森點樣搭路入麗展,𠵱家真係得個「估」字。電訊盈科嘅前副主席張永霖,喺合併後嘅新公司內,曾經負責協助集團商討大型收購項目,華華估計,張永霖同張森應該共事過,會唔會就係咁搭到入去麗展嘅董事會成員、即係張永霖嘅弟弟張永森呢?
[email protected]