滙豐最近搵咗牛津大學老齡研究所，喺全球做未來退休生活嘅研究，其中嘅有趣發現係，60歲以上人士，每年繳納稅款有13億；每年參與嘅義工服務，按工值計算超過15億，加埋每年嘅經濟效益相當於28億元，等於香港本地生產總值14700億元（06年）約0.2%。
雖然老年人都係一股不可忽視嘅經濟實力，但研究發現本港40至50歲嘅人士中，超過四分一希望提早退休。
牛津大學老齡研究所所長SarahHarper估計，可能因為政府鼓勵市民提早退休，畀年輕人多啲機會搵嘢做，不過，喺人口老化嘅影響下，再過10至15年，香港嘅老年人會多過年輕人，到時會出現技術短缺問題，佢呼籲政府正視，仲建議將退休年齡延遲3年，即係到63歲。