側田日前直言不想做沒有酬勞的演出，結果遭樂壇校長譚詠麟力斥他應該去上堂，前晚兩人在回歸騷上碰頭，阿倫當着黃柏高（Paco）面前教訓側田做人道理，而側田則表示他並非不想做騷，只是太攰。
譚詠麟、側田、李克勤、方力申及楊千嬅等歌星，前晚於會展出席「RoadShow慶回歸心連心晚會」，早前側田埋怨常做沒有酬勞的演出，又謂歌曲越唱越爛，作為樂壇校長的阿倫得悉其言論，即反駁側田該上堂好好學習，前晚側田由經理人Paco陪同下見記者，同場的阿倫再教他做人道理。
大讚Paco有條理
阿倫率先接受訪問，坦言在後台已見側田，他笑說：「佢仲叫我uncle，當時我摺一摺衫袖，眼神瞟一瞟，見佢好似想講嘢咁，我咪叫佢唔好放在心，講錯咗就算，好似跨欄咁，跌跌吓就大，我都跌過。佢冇表示呀，我助手拉咗我去練歌，對話就無疾而終囉。」
其後側田與傳媒見面，他說：「你哋誤會咗，我點會話唔鍾意做騷，showismylife，showismypurpose。」適逢阿倫現身，Paco即說：「多謝倫哥，撐後輩係應該嘅。」側田對此木無表情，阿倫即笑問：「佢有冇嫌辛苦呀？」側田搶答：「我唔敢講嘢。」而Paco則說：「平時接咗好多慈善騷，我哋冇清楚解釋佢知，佢可能唔理解啫。」對此阿倫說：「經理人講嘢零舍唔同，講嘢有層次，一層一層解開晒，抽絲剝繭，冇晒疑團，新人未必識講嘢。」
自動封嘴怕講錯
側田其後再向記者解釋說：「我唔係唔想做騷，係太攰，我想做碟，有錢冇錢都會做。」Paco又拍他謂：「得喇，唔使再講。」側田笑說：「唔講太多，費事越講越錯。」此時阿倫又搭嘴說：「新人做嘢唔一定有收穫，有啲收穫係無形嘅。」Paco附和道：「係囉，已經上咗一課，得喇。」阿倫隨即謂：「希望啦。」
採訪：王連連、駱華齡
攝影：葉君海
