投資銀行生意競爭激烈，喺安排大型新股上市呢瓣固然爭崩頭，家陣連啲幾億銀嘅deal都爭餐死，但依然好多公司想喺呢行插番支旗，馬拉資本嘅僑豐金融集團，就係最新嘅新丁，上個禮拜五佢哋啱啱完成收購安永企業融資，仲即刻改埋名叫僑豐融資。
佢哋喺香港嘅首領（僑豐金融集團董事總經理）許照中話，呢個團隊暫時只有六人，但會擴到十人以上，希望日後可以幫啲馬國種植同礦務公司，又或者馬國華僑嘅大陸投資，喺香港上市，港交所聽見實好歡迎啦。
講開馬拉，許照中仲話，大股東僑豐控股已成為當地首家發行香港上市公司窩輪嘅證券行，呢三隻今日掛牌嘅窩輪分別係中移動、工行同中石油，遲啲仲有另一家行會發長實同埋滙控輪㖭，呢勻香港股票窩輪真係開枝散葉咯。