呢幾年香港路面出現咗個怪現象，就係無時無刻都有工程做緊，幾乎A電燈公司整完電纜鋪番好條路之後，唔夠幾日又到B電話公司嚟開工掘路，搞到成日塞車、條路熔熔爛爛，地下嗰啲行車線嘅痕迹都有幾條，唔熟路嘅實俾佢陰到。
悠穎馳覺得最恐怖反而係嗰啲放喺路邊嘅黃色改道路牌；其實有關當局對呢類臨時交通標誌嘅規格同擺放位置，都有一定規限，但老實講又有幾多人會跟隨呢？最記憶猶新係大埔公路大圍段，嗰度進行緊幹線架空橋工程，附近路面已面目全非，而喺不足500米長嘅路面上，每邊更有超過10個改道路牌放喺度，係咪太多？哈，但係佢哋嘅Size同字都係好細隻，司機根本無可能睇得清楚。
悠穎馳覺得，呢類臨時路牌嘅作用係提醒駕駛者前方有工程進行，清楚而明確嘅指示係必需嘅，同埋既然有關當局已對呢啲路牌有明確嘅規定，咁點解唔跟隨呢？
悠穎馳
豪邁不羈，愛車如命，聽幾下引擎聲就知咩車！