AC米蘭後衞尼斯達早前學托廸咁拒絕國家隊徵召，背後原來係因為上月30日結婚，結束同女友加庇拉9年愛情長跑。由於老友大都走晒去參加國際賽，所以呢個婚禮只有利華蘭尼同費華利參加。婚禮完咗冇耐，尼斯達仲為舊年10月出生嘅囡囡蘇菲亞舉行洗禮儀式。有老婆有女，意大利隊都好難請佢出山喇！