卡門高唱：「愛情，不過是一件普通的玩意，一點也不稀奇！」雖然不稀奇，仍有萬千癡男怨女自投羅網，正如股票魅力不容睇小，吸引萬千股民前仆後繼一樣。愛情同股票睇嚟九唔搭八，其實，某啲地方好鬼似，唔信，睇落就知。
買藍籌：好似搵一個最夾嘅人同你一生一世。買咗唔需要放，放咗買唔番，而且一定後悔。只要有耐性，回報極之可觀。喺揸住隻藍籌期間，你會信心動搖，受外來誘惑，但只要有決心，必成正果。
二三線股：好似拍散拖，風險大好多，亦刺激好多。唔排除有一日修成正果，但機會少之又少，通常甩拖機會較大。
窩輪=一夜情
買窩輪：好似一夜情。買之前，你都已經知道同賭冇乜分別，係會更刺激、更好玩，但亦要預咗輸清光，十個有九個都發夢付出少但回報高，但十個有九個都會係輸。
入場費：買大隻好股一般都有最低入場費，好似滙豐（005）咁，最少都要5萬幾蚊。追好嘅女仔都有一定入場費──樣唔衰、人唔窮、有耐性、有心計，同埋好似滙豐咁，你唔買，大把人買。
差價：喺股票報價中，有買入（Bid）同賣出（Ask）兩個價，即係投資者願意買入、同賣出嘅價格。喺男女關係當中，我哋可以理解為男人願意付出嘅，同女人願意接受嘅條件，Bid同Ask相差之價格，我地稱為差價（Spread），𠵱家香港嘅情況就係Spread越拉越闊，因為差價擴大，成日都冇成交，咁你𠵱家應該明白，點解香港越來越多老姑婆喇。
A股：至於啲男士，佢地唔買港股，去晒買A股，因為A股冇將個Ask亂放，只要男人唔將個Bid放得太低，就會有主動沽盤；不過，要注意A股已經升咗好多，情況有啲改變。
逆市買賣：股票市場嘅大贏家，都係人棄我取嘅勇者，當人家最瘋狂嘅時候離開，人人睇淡嘅時候入市。但愛情就千祈唔好玩人棄我取，應該理解為，當伴侶好失落嘅時候，你要依舊對佢咁好，一起相伴等黑暗過去，光明來臨；對方極度風光，佢又依舊同你一起──簡單啲講，即係可以共富貴，亦可以共患難。
http://www.uwants.com/viewthread.php?tid=4047300&extra=page%3D4