上禮拜三A股同B股急跌，跌停板股約900隻，跟住嗰日反彈，禮拜五又碌返落嚟，跌停板股約800隻，國內股民少咗趁低吸納嘅豪情壯語，多咗對政府嘅謾罵同恐懼嘅說話，跟住落嚟會點？唔會有先知，只能「走着瞧」。
A股跌，H股表現強好多，有人話H股咁大折讓，A股跌H股唔一定跟住跌，啱嘅；亦有人話H股有可能要維持番之前嘅折讓幅度，所以都會跟住跌，都啱。點解兩個都啱？因為大家從選擇咗嘅角度推論，都得到某一個結果，呢啲就係唔同角度有唔同睇法，所以，關鍵唔係邊個啱，而係市場嘅發展，最終會脗合邊個角度，呢樣嘢亦係無先知，所以就算中咗，都係撞啱啫。
港股嘅走勢係反彈受阻，呢個禮拜會同時受花旗同國內股市影響，跌落去試50日線比抽上去嘅機會大。
招行C輪9565：招商銀行（3968）上禮拜五大成交升破10日線，企喺20.85元收市，同其他保險同銀行股齊齊舞上去，短線睇23元，可以買啲C輪9565。隻輪𠵱家造20.5仙，槓桿率10.2倍（有效5.7倍），對沖值0.56，正股升上23元，9565應該唔會低過34仙，正股跌穿19.80元止蝕。