近年私募基金收購企業之聲不絕於耳，唔少人不禁心生疑問：呢股併購潮到底幾時見頂？
AdamLashinsky喺《CNNMoney.com》討論區中直言，佢覺得𠵱家嘅私募基金併購潮，就好似99年科網時代一樣，仲有唔少專家都話呢個泡沫好快就爆，到時市況逆轉、銀行會加息同埋推出嚴格限制，同𠵱家嘅情況截然不同。
網友Tom就話：「其實每個市場出現泡沫嘅過程都係大同小異，都係由一個被忽略或新市場而起，最初有少數膽識過人嘅投資者做先驅，當佢哋嚐得甜頭後，就會引嚟一大班人跟風。問題係市場未必有咁多好嘢值得投資，當啲人開始盲目將錢投入市場後，泡沫就會越嚟越大。」
私募基金併購潮殺到
Tom仲話私募基金如果投資失誤，必定後患無窮：「家陣資金氾濫，唔少私募基金都會透過高價收購企業，將佢私有化、改造、重組，再重新包裝上市，以賺取最大投資回報。最弊係萬一私募基金嘅如意算盤打唔響，唔單止投資者損失慘重，間公司仲要孭重債、被人玩到體無完膚。」
Jim就將泡沫歸咎聯儲局政策寬鬆，令利率過低以致資金氾濫：「近期樓市出現嘅危機都係拜聯儲局所賜，而且市場有過多熱錢進行併購同回購公司股票，最終可能搞個『大頭佛』出嚟﹗」
不過，Larry就比較樂觀，覺得唔應該危言聳聽：「私募基金併購企業後，可以改善公司嘅管理，為收購返嚟嘅企業瘦身去除瘀血，其實對間公司未來發展都算好事。」
J.Donohue都附和：「私募基金與對沖基金好唔同，佢哋收購企業後，大多會定下發展目標，去蕪存菁，長遠嚟講對間公司嘅員工同客戶都有好處。」私募基金有遠見又有錢，難怪連中國國家外滙投資公司都話要斥資30億美元（約234億港元）入股即將公開發售新股嘅Blackstone（黑石）啦！