車仔球員唔肯捐款，唔通係想同據悉會閂水喉嘅老闆阿巴莫域治「行動一致」？
Hi！今日係我求驗客換新裝第一日同大家見面，本來應該好高興，點知睇到以下呢段消息，就真係有啲㷫，因為原來腰纏萬貫嘅英超球員，好多都唔肯捐自己一日嘅人工出嚟做善事，其中富豪球隊車路士更竟然全隊都㩒實自己個荷包！
全隊無視護士籌款
由於英格蘭護士人工普遍好低，普通護士年薪只得19,000鎊（約294,000港元），所以有關方面發起同護士應急基金籌款，希望英超球員可以捐出自己一日嘅薪金，仲搵咗曼聯嘅傑斯、加利尼維利同埋阿仙奴嘅亨利做代言人。點知，喺全部556名英超球員中，只得225人響應，強隊中以利物浦反應最好，包括謝拉特同加歷查在內，有12名紅軍球員捐款，但亨利就只係游說到兩名兵工廠隊友捐款，傑斯同加利尼維利嘅紅魔隊友亦冇個響應。
中小型班慷慨
不過，佢哋都唔夠車仔衰。車仔球員雖然喺05/06球季合共薪金為1.14億鎊，但竟然冇球員肯捐錢，連本身係英格蘭人嘅泰利都sayno，難怪籌款籌辦人赫絲話：「我都唔知點解佢哋咁唔大方，不過有心唔怕遲，如果車仔球員想捐輸，可以隨時嚟搵我。」
反而中小型班就慷慨得多，富咸、雷丁、韋斯咸同埋已降班嘅屈福特，硬性規定全隊捐出一日薪金。