世紀城市（355）變身資源股，進展神速，短短兩個月，已經有大買家要貨，仲一簽10年約，未來嘅收益有晒保證，而每年嘅盈利，仲係𠵱家嘅兩三倍，或甚至更多。
4月初，推介世城，當時股價0.182元，兩日內就大升到0.465元，升幅155%，大升後必然要調整，雖然有債務重組歷史遺留下來的問題，債權人見利回吐，沽盤無疑好勁，但好明顯有對手，大買家未有停過接貨，近日股價由低位回升，個多月的收集應已完成，今次再爆升，有力創出新高。
最新消息，係世城4月中投資蒙古的鈾煤礦51.8%權益，好快會有收成。礦公司現時已取得開採煤的採礦許可證，今年10月可以投產，而世城則已同分銷商斟掂數，每年供應不少於200萬噸煤炭，為期10年，分銷商業務係向中國主要發電及電力公司（包括中國華能電力集團）供應煤炭。
未來盈利將大增
唔計開礦，單計供煤，1年可賺幾多？現時中國煤炭市場價約50至55美元一噸，成本連運輸用途約35美元，以平均每噸賺15美元計，1年可獲利2.3億元，係世城06年（12月年結）盈利1.07億元的兩倍。
要留意兩點，第一，200萬噸煤產1年係最保守估計，產量上升，盈利照增；第二，煤炭價格持續上升，中國向日本供應價最新已上升到68美元，產品漲價，賺得更多。
礦公司亦已獲批採鈾許可證，礦地面積1410公頃，比合約不少於1000公頃大好多，有關勘探報告本月底可完成，聽聞世城對藏量好滿意，有意進一步增持。
08年，世城本業收益上升，加上資源項目貢獻，保守估計可達4億元，每股賺2仙，但鈾礦隨時可提供多2至3億元盈利，即每股賺3.5仙，預測PE只係10倍，以後每年會賺得更多，資源股PE起碼15至20倍，大戶現時大手扯吸，日後隨時可以賺一個開。
補充一句，新華文軒（811）可加碼，初步上升目標提升到10元。