古時謀士遊走於列國之間，可以一言興邦、一言喪邦；皇帝可以一不高興，就下令人頭落地；現今領導人一啲都唔輸蝕，揮一揮手就可以操控眾生，唔信，有辦你睇──
老毛一揮手：下鄉！
老鄧一揮手：下海！
老江一揮手：下崗！
老胡一揮手：下跌！
加稅鬼祟 股民聲討
對於大陸財政部突然宣佈提高印花稅，拖累股市狂插，上海同深圳A股分別狂跌6.5%及7.2%，惹嚟內地網民嘅一片聲討，話今次財政部出招打壓股市嘅方式，好似小偷咁鬼鬼祟祟，上海網友124.78抱怨：「政府唔能夠咁迫死啲股民，個股市先至啱啱成長，就咁樣俾人監生掐死。」Hebingyuan33就呼籲：「要強烈譴責國家稅局同財政部。」金融界網友更聲稱要拉財政部部長上法庭，等法官審問佢。
浙江紹興網友60.187好憤怒咁話：「財政部唔要臉，對自己人就下咁重手對待，有本事就去欺壓美國人吖！正一吃裏扒外的王八蛋！」廣東深圳網友219.133就話：「呢啲完全係中國特色嘅股市，人為操控。」
早出口術 衰太貪心
不過，網友東湖以北就認為：「其實輸錢嘅股民唔可以怪得邊個，係人都知道個股市有問題，只怪啲人太貪心，唔相信自己係最後一個坐艇嗰個，政府已經不斷咁提醒股民要小心㗎喇！」
Xinningke認為，就算政府想壓抑個股市都唔係咁容易，「只要中國經濟仍然係咁快速增長，喺良好嘅社會經濟環境下，股市仍然會不斷咁升。」
http://www.tianya.cn/new/publicforum/Content.asp?idWriter=0&Key=0&strItem=develop&idArticle=118335&flag=1
