內地影迷追星事件真係好瘋狂，早排就有楊麗娟狂戀偶像劉德華，搞到自己阿爸自殺身亡，大前晚又發生22歲追星少年謝鋒喺張學友湖南演唱會度，服食60粒安眠藥自殺事件。
遭父狂打性情變
據雅虎網站轉載內地嘅報道，上周五晚上7點幾，謝鋒攞住張用400蚊人民幣買返嚟嘅門票，進入長沙駕龍體育場，佢坐喺B區第五排，演唱會開始後，謝鋒想將手上嘅遺書同埋一封寫畀學友嘅信攞上台畀學友，但因為保安嚴密，佢冇機會接近舞台，於是吞咗60粒安眠藥，佢昏迷之前話：「我想擺脫05年的陰影，我要告訴別人我不再喜歡周杰倫。」
救傷車將謝鋒送咗去長沙巿第三醫院，佢醒番之後同內地記者講話自己唔係學友歌迷，亦唔明點解自己咁做。謝鋒以前係周杰倫歌迷，05年12月17號喺廣州天河體育中心舉行嘅周杰倫演唱會上，佢曾經吞過30粒安眠藥，之後獲救。謝鋒話佢10歲嗰陣，阿爸搵木棒同鐵棒打佢，打到佢頭顱內病變，個性偏激、極端、暴躁，仲有偏癱症，要成8萬蚊手術費先醫得番，又話自己病咗之後冇人理佢，內地之所以有咁多狂迷，睇嚟都係家庭問題演變出嚟。
