滙豐噚日推出新嘅「創富智囊」網上系統，請咗近年搞舞台劇好掂嘅詹瑞文同《信報》專欄作家曹仁超做代言人。搞藝術永遠儲唔到錢？詹sir喺啓動禮上話，9歲開始儲錢，10個月前先夠數，喺滙豐開咗個投資基金戶口，至今有9厘回報，雖則奀咗少少，但就好滿足，相信可達成起劇院嘅心願。佢好大口氣話，建築費不過1億銀，但好難攞地，希望有心嘅地產商支持吓。
曹sir亦難得風騷，話投資同藝術共通，皆因講求專注同睇長線。佢仲話，由細到大都想搞藝術，只係入錯行，21歲時已經知道齋儲錢難致富，當時銀行服務較少，惟有投資、買保險兼諗埋退休大計，點知讀者又跟，可以話係各方銀行捧紅佢喎。
20萬先有得睇
滙豐亞太區個人理財業務「一哥」李錦榮乘機賣廣告，話只要幫襯買理財產品滿20萬銀，就有機會攞到曹詹兩人喺9月9日只演一場嘅「富爸爸，笑爸爸」TalkShow門券兩張，要求都好高啫。
[email protected]