有人話，年齡係女人嘅秘密，咁，薪金應該係男人嘅秘密。對於企業同打工仔嚟講，薪酬係好敏感嘅話題，唔少企業更明文規定，工資係公司嘅秘密，員工之間唔可以互相打聽。debmd喺《MSN討論區》問：「職員之間應唔應該談論薪酬？」
pondhopper1話：「梗係唔應該，因為員工發覺自己人工少過同事，就會產生嫉妒心，覺得公司大細超，甚至會冇心機做嘢，成日諗住跳槽。」
怕揭底牌斷後路
cat21話：「喺公司談論薪酬，會令員工同老闆尷尬，所以都係少講為妙。」喺人事部任職嘅TheReflector講：「我老闆禁止職員洩漏薪酬秘密，費事啲員工互相比較，或者因為嫌人工低而要求加薪。公司將薪金保密，將來調整薪酬時亦可以有更大彈性。」
lifetimeexpatriate就反駁：「我公司不但准許職員談論薪酬，更主動公開各類職位嘅薪酬範圍，等啲職員知道自己嘅晉升途徑，有一個清晰嘅奮鬥目標。如果公司將薪金保密，職員之間反而會互相猜忌。」今年20幾歲嘅anne81話：「可能係因為年輕人百無禁忌，我同成班朋友經常交換薪酬資料，互相比較，咁樣就可以知道自己嘅人工合唔合理，有冇俾老闆搵笨。」
好多大公司例如戴爾（Dell）、新力（Sony）、聯想（992）等，都嚴格推行薪酬保密制。不過，工資越冚得密，員工越有好奇心，為咗提高薪酬透明度，唔少打工仔現時鍾意喺互聯網上「晒人工」，公開自己搵幾多錢。