喺97年7月1號出世、同特區一樣咁高咁大嘅小朋友，喺呢兩個月變成「政治金叵羅」，120個「7.1」細路，噚日獲安排去禮賓府開生日會。正常嘅BirthdayParty主角係壽星仔、女，仲大把嘢食大把嘢玩；不過呢個係政治生日會，指定生日願望係國運昌隆，生日蛋糕竟然係紙造嘅道具，認真大吉利是，壽星仔淪為陪高官影相嘅人肉佈景板，主人家煲呔夫婦真係招呼唔到。
唔准亂行亂企亂講嘢
為免120個濕水欖核亂闖禮賓府禁地，搗亂龍師傅風水陣，民政局用旅遊車將佢哋送到禮賓府大門，由指定路線行入禮堂，湊仔嚟嘅家長坐埋一邊。之後一班壽頭就要喺台前砌個「10」字，原來喺做特首夫人曾太影相背景。有個家長企起身想幫囝囝影相留念，即刻俾人叫「sit」，認真冇癮！
除咗唔准亂行亂企，呢個生日會連願望都唔可以亂講，大會指令班細路大叫「祝願祖國國運昌隆」，一眾家長聽到都不禁起哄，「有冇搞錯呀？細路仔有咁嘅願望？」砌圖同許願綵排咗大半個鐘，工作人員見班細路無乜差錯，先請曾太出嚟，但唔係招呼客人，只係走埋個「10」字度舉起「V」字手勢擺pose影相。
嘉賓獻唱全場O晒嘴
生日會高潮係切蛋糕，真正主角煲呔一身casualwear現身，佢兩公婆企喺個紙造嘅道具蛋糕後面，壽星則統統靠邊站淪為路人甲乙丙，唔知係生日會，仲以為係煲呔慶祝結婚周年。影完相，政治生日會禮成，煲呔同老婆即撇，成班豆丁同家長仲未走得，事關仲有下半場。民政局搵咗家燕媽媽同青春偶像裕美（大家知唔知佢係邊個？）唱歌，全場人睇到O晒嘴。悶咗近兩個鐘頭，小朋友又餓又攰，工作人員終於每人派一份三文治、一個蘋果同一包荳奶，為免整污糟煲呔屋企，要上番旅遊車先食得。
其實政府要拍香港回歸十周年宣傳片，大可光明正大搵小演員，借啲意話開生日會，實際就搵咗班壽星仔笨，難怪有小朋友扭計，「我希望有真蛋糕，唔係紙板嗰種呀！」下次再搞呢亭政治生日會，真係搵鬼去。特區政府掟10億出嚟搞個送飛都冇人睇嘅巨星匯眼都唔眨，搞個生日會就咁孤寒縮骨，對唔對得住同特區同齡嘅細路呀！
