混能車省油環保，係人都知係好嘢，之但係一旦真係要買車嘅時候，好多準買家都會諗吓先，原因一字咁淺——貴。
不過，好多嘢都係雞同雞蛋嘅問題，混能車其實已經係非常成熟同實用嘅車種，但無奈佢嘅價錢比普通車貴一截，所以令唔少用家卻步，用家卻步，就會令到普及率低，普及率低，即係唔能夠大量生產，唔能夠大量生產，價錢就唔可以降低！
所以有好多事情都一定要靠政府去扯頭纜，美國紐約市政府為環保為減少消耗石油，都好想混能車普及，但無奈單靠市場自動調節恐怕真係有排等，於是市長決定由秋季開始引入混能型號嘅的士，2012年將全市嘅的士轉晒做混能車，到時預計可以節省一半油費同減少30%嘅廢氣排放量。
悠穎馳深信，有政府幫一把嘅話，混能車嘅價錢降低，吸引更多人買，形成良性循環。為藍天打氣，唔係得把口講，而係要好似紐約政府咁實際去做㗎！
悠穎馳
豪邁不羈，愛車如命，聽幾下引擎聲就知咩車！