無綫劇集《師奶兵團》播出收視高開，首集平均收視32點（約207萬觀眾），最高收視更高達33點（約214萬觀眾），除了三個劇中師奶主角鄧萃雯、商天娥及葉童備受注目之外，近日更有不少觀眾及網友開始留意在劇中與商天娥飾演草根夫婦的艾威。入行近30年的艾威，被歸類為甘草演員，初登男主角之位的他，自問是對母親的一個交代。
偕智叔讀藝訓班
艾威出身於無綫藝員訓練班，同期訓練班同學有湯鎮業、景黛音、黃造時及廖啓智，艾威入行近30年，一直默默扮演着草根綠葉角色，不過網上討論區就有不少網友大讚他雖然長期做綠葉，但每次都認真演出，絕不欺場。
艾威表示人生第一份工作便是當演員，不願透露年齡的他解釋說：「始終有少少覺得自己做咗咁多年都冇乜成就，自然就唔係好想話畀人聽幾多歲，你哋自己計啦，喺訓練班畢業嘅第一份約，係阿媽同我一齊去簽，因為當時未夠年齡。撈家（羅嘉良）都不知有幾多次趁我飲大幾杯問我屬乜，我都話屬鱷魚，醉到點我都唔會講。」
艾威曾經演出不少劇集，多年前在劇集《大鬧廣昌隆》中扮演林家棟的舅父仔三六九，其中一幕講他遭小芙蓉（周海媚飾）上身，要與林家棟談情，艾威演繹一個女人時，的確有如鬼上身般投入，演技毋庸置疑，至今仍令觀眾留下深刻印象。
艾威表示多年來走在街上，經常遇到一些欣賞他演技的觀眾，遺憾的是大多數觀眾都記不起他的名字，他說：「成日有人同我講話好鍾意我做戲，不過記唔起我個名，見到其他人有成就，我唔會酸溜溜，照吓鏡都知自己個樣唔可以同人比，最多都係做個性格演員，不過都好似唔太成功。」
演技媲美發哥偉仔
自言一向有作其他投資的艾威，也曾想過放棄做演員，其母卻經常拿他與影帝級演員比較，他說：「我諗有好多做呢行嘅人都會問過自己係咪適合做呢行，其實平時都有其他投資，自問都幾有天份，生活唔成問題，不過始終都想繼續做戲，況且屋企又唔會畀壓力我，可能媽咪又幫得手，成日話我得，問我幾時做男主角，佢成日將我同啲好勁嘅人攞埋嚟講，好似梁朝偉呢啲級數嘅，我諗所有阿媽心目中，自己個仔都係最好嘅。」
艾威年前有份在藝進同學會的話劇《嬉春酒店》中演出，他表示至今仍令他非常難忘，他說：「嗰次我係同發哥（周潤發）做同一個角色，梗係好開心啦，同發哥做A、B、C角喎，對自己嚟講都係一種肯定。」
撰文：卓美娟
我是誰：多產綠葉默默耕耘
艾威原名徐威信，79年參加無綫第8期藝員訓練班入行。據知艾威是唱得之人，在藝員訓練班畢業表演中，獻唱日劇《柔道龍虎榜》的主題曲時一鳴驚人。
艾威曾參與多部電視劇，多數扮演綠葉角色，代表作包括有《大時代》中飾演暗戀玲姐（藍潔瑛飾）之小男人警察；《金玉滿堂》飾演為人奸險的御廚蔣慶嘉；以及《戀愛自由式》飾演游泳教練游德等等。艾威亦曾參與電影拍攝包括《暗戰》和《審死官》。感情路上，艾威曾跟前三級女星陳穎芝拍拖，不過二人已經分手。
