「旺氣」喺圈中人緣一向勁差，同佢合作過嘅人，一聽到佢個名就走夾唔唞，因為佢經常意見多多，成日以為自己做戲好掂，就四圍教人做戲，好似最近佢拍嗰部長劇咁，佢經常對住工作人員彈「叉燒飯」、「荔枝」同「生蠔」嘅戲做得唔好，話如果佢演嘅話一定會咁做咁做，人哋聽到條氣梗係唔順啦，事關大家都係咁高咁大，叉燒飯同荔枝仲做過女主角㖭，點解要聽佢支笛喎，加上「布衣」之前同佢合作已經鬧不和，所以成班演員對旺氣都好抗拒，平時拍外景放食飯，都唔會預埋佢一份，就算出埠拍外景，都唔會搵埋佢食飯行街同去玩，當佢半透明咁滯，由得佢做獨孤精。原來，班演員成日最開心嘅事，就係食飯圍埋一齊講旺氣是非衰嘢，講得多仲變成咗佢哋嘅最佳娛樂㖭。
Textby關仁