煲呔做埋呢五年就要退落嚟冇得連任，佢最強對手陳太亦顯得意興闌珊，接受路透社訪問時，話如果自己後生啲，可能會選特首，𠵱家就冇興趣嘞，事關已經一把年紀，只想安享晚年。
陳太今年67歲，如果煲呔做足五年，下次特首選舉時陳太年逾70，𠵱家全球政治領袖年輕化，咁大年紀仲參選確係輸蝕啲。
阿爺始終忌陳太，訪問中陳太直指北京對港人缺乏信任，又指時代轉變，殖民地冇民主，唔代表特區政制就可以一成不變，如果北京堅持日後要「預選」特首候選人，香港人一定唔接受咁保守嘅政改方案。
陳太個核心小組有就政改畀意見，不過政治能量好似較想像中細，佢話最重要係個個市民都發聲，否則就抵香港人冇民主。