最多Fan屎：廸士尼睡房好招積
豆丁跳上床：「媽咪，巴斯光年同三眼仔呀！招招招招！」眼寃拖友：「耶！你睇小熊維尼張枱幾Cute！」廸士尼形象根深柢固，全球Fan屎多如天上繁星，香港B&Q當然識做，在家品部特設Disney專區，小至BB用嘅口水肩、大至屋企嘅傢俬全部有得你揀，甚至市場超罕的床架、衣櫃及梳妝枱亦一應俱全。最吸引Fan屎的寢室陳列區，仲砌出４大廸士尼的主題房間，就算你撲入大嶼山的Disneyland都買唔到！充滿童心的大朋友同細蚊仔，當然睇到賴死唔肯走啦！
最大舖面：1間舖=2個標準足球場
B&Q是來自英國的國際性家居裝修建材零售商，香港旗艦店佔地兩層（4樓及3樓），總面積逾12萬平方呎，大約有2個國際標準11人足球場咁大。其中4樓的主題是「編織夢想」，陳列各式的家居裝飾產品；3樓則齊備各種建材傢俬，讓客人締造自己的理想家居。小記當日於B&Q由頭到尾行了兩轉，差不多花了3小時，腳仔當堂軟晒。最慘係駐場的Starbucks尚未正式投入服務，待開張後應該有地方畀客人歇一歇，歎番杯Mocha再上路一定舒服好多！
最大橢圓電視屏幕：全港獨創勁吸人氣
遠看MegaBox，紅色外牆有如其名成個盒狀，甚為耀眼。甫進入內，由電梯直上5樓，不難發現有個橢圓大電視壓頂，搶盡眾人焦點。呢個直徑長10米的電視屏幕名為VideoEye，官方話用了大半資金建設呢個全港獨有的屏幕，雖說香港大型商場如朗豪坊、apm等均有大型屏幕助陣，但呈橢圓形的，又真係MegaBox獨創！包圍屏幕周邊更有數萬個幻燈，日間隱約見到閃出MegaBox4個大字，屏幕會播放商場宣傳短片、電視新聞及娛樂資訊，足夠煲旺商場人氣，到時可能做埋明星大騷，氣氛必定一時無兩！
最密集巴士：5分鐘一班Shuttle
MegaBox正式開業日子，已經揀定本周四（6月7日）為良辰吉日，不過場內3間大舖B&Q、Spotlight及Best電器已在6月1日率先開檔搶客，逼住MegaBox亦要敞開大門作試業。現時商場方面已經開通咗穿梭巴士接載顧客來往九龍灣地鐵站，一旦正式啓業，就會分別在九龍灣地鐵站、宏天廣場設立5分鐘穿梭巴士，假日在觀塘巧明街及又一村更加開特別班次，給更多客人方便。
小記試搭過，穿梭巴士細細架可載約30人，一旦開業期間顧客爆棚，商場方面更會安排可載50人的大車接送，總之不怕無車接送來往地鐵站，交通算係好方便！記得去到九龍灣地鐵站，在A出口跟住路標指示就會搵到穿梭巴士站，車程唔使5分鐘即到！如果唔想等車，步行10分鐘又得，對住成個九龍灣最紅的MegaBox外牆，一定唔怕蕩失路。
Kenneth：「感覺好大，B&Q都有兩層，係打發時間的好地方！但洗手間入口要推好多門，唔方便。」
Isaac：「一入MegaBox就俾個大型屏幕吸引，從來無商場係咁，希望第日商場可以搞多啲表演。」
王小姐：「個場紅色為主，好Sharp好醒神，而且分區鮮明，有家庭、食肆、兒童同娛樂，一家大細都啱行。」
新張期內攞着數
1.Sony潮熊限期迎賓
為了慶祝MegaBox新張開業，Sony「借出」旗下潮熊PostPet做迎賓熊，聽講去到6月中咋！想同呢位潮界Icon影靚相，趁早去MegaBox行吓，呢啲嘢可遇不可求！
2.買粒糖免費泊車3個鐘
商場有19層，泊車位一定唔少得。MegaBox共設有1,000個場內泊車位，停車場更設有特快車道設計，車輛只須迴旋３圈即達高層！各位車主唔使驚無位泊車，因為新開張期內在MegaBox內店舖作任何消費，即使買粒糖、買杯嘢飲，就已經有3個小時免費泊車優惠，車主一於帶埋老婆仔女去Shopping啦！
3.即做VIP享全場八折
去Spotlight入場前填Form做埋VIP，在6月8日前即可享有全場八折優惠，各項推廣優惠亦預埋你！
4.免費送贈紅運袋
6月7日星期四是正式開張日，如果你着住紅衫紅褲或紅鞋、戴紅飾物、孭紅手袋，只要身上有一樣嘢係紅色，於指定時段就可以免費攞到MegaBox紅運袋一個，數量超過10,000個！紅運袋內包括MegaBox環保袋、精美紀念品、商戶精選禮品及現金券，派發日期至6月10日。
紅運袋派發時段
日期：6月7日至10日
時間：1:30pm-2:30pm
6:00pm-7:00pm
地點：MegaBox5樓中庭
5.專用信用卡折扣多
商場將會聯同恒生銀行，推出MegaBox專用信用卡，在場內購物享有折扣優惠。場內每層更設有一個刷卡機，定時定候刷一刷，就會有不同商舖優惠券印出，啱晒各位鍾意平靚正的購物狂。不過信用卡至截稿前暫未正式公佈幾時開始接受申請，大家要打醒十二分精神吼到實喇！
MegaBox
地址：九龍灣宏照道38號
電話：29893000
營業時間：
星期一至日10:00am-10:00pm
網址： http://www.megabox.com.hk
