「矇麵」喺熱爆劇《佛跳牆》入面，做一個撬好友牆腳嘅第三者，雖然佢個樣入型入格，不過佢連發音都發唔準，將戲入面男友個名讀成「亞佛」，就真係睇到啲高層頭都暈埋，亦因為佢做戲唔掂，套劇紅晒所有人，惟獨紅唔到佢，仲令佢成為笑柄，令矇麵覺得好冇面。
詐病唔宣傳
呢排所有宣傳活動矇麵都刻意缺席，甚至詐病都敢，仲成日返公司嘈啲高層，話自己人氣本來好好，俾個狐狸精角色累死。
其實矇麵自己又唔知，佢有今日嘅人氣，都係多得佢泊咗男友粉絲碼頭，不過班高層為咗息事寧人，嚟緊會搵佢拍住「可憐小生」拍劇做女主角，如果下部劇都唔得，睇怕矇麵都可以叠埋心水嫁人唔使做喇！
Textby關仁
