慶鈴汽車（1122）係主板當中，5隻仲有NAV折讓嘅國企股之一，資金挖落後，遲早實大炒慶鈴。家陣主板國企股總共98隻，講緊仲有NAV折讓嘅，一隻手數得晒，包括：瀋陽公用（747）、科龍（921）、新華製藥（719）、先進半導體（3355），同埋慶鈴。前邊兩隻國企股長期停牌，想搞都冇得搞，後邊3隻，又以慶鈴P/B最吸引，去到0.6倍（即係折讓40%）水位。齋計主板，慶鈴唔止係唯一有NAV折讓嘅汽車股，兼且係NAV折讓最大嘅國企股。
要咁睇，國企股3月調整完，又再癲過，市場埋身落後國企，P/B係其中一個考慮因素。慶鈴現價仲有咁大折讓，炒NAV折讓，已經極之吸引。再講，扣除慶鈴H股股東五十鈴同VP權益，慶鈴H股街貨市值得11億銀咁大把，貨源亁身好炒。唔使講咁多，博慶鈴P/B上番1倍，慶鈴要見2.7元，即係現價（1.64元）回報率64%。
位元堂炒同氣連枝
位元堂（897）最新NAV0.46元，現價（0.35元）相對折讓24%，連埋出售九龍灣物業，獲溢利1億銀計，NAV上到0.53元，折讓上到近34%。位元堂有NAV墊底之餘，醫藥保健類當中，仲有咁嘅折讓水位，又係冇乜幾何。又位元堂大股東宏安（1222）拓展農副產品業務，呢期股價一支箭，位元堂靜局好耐，就算無新業務，炒同氣連枝都可以。短打博升20%見0.42元。
錢雋