繼華置（127）話私有化又取消之後，細細劉突宣佈劈炮唔做金匡（286）主席兼執董，系內公司咁多變卦，呢系股票要加番個風險溢價。金匡無咗富豪第二代概念，殼價仲值唔值14億頗成疑問，但同時間公司賣清資產後的確要宣佈新嘅業務，否則唔符合上市條件。有咁多懷疑，睇定啲至搞最穩陣。
近排經常有啲長期受忽視嘅實力股仔爆上，例如東力實業（978）、嘉利美商（704）等，儲定呢類股仔話唔定忽然有資金睇中。奕達（2662）係其中一隻考慮對象，呢隻PCB（印刷線路板）股相信早已傷盡基金同股民嘅心，05年底上市以來，除咗早期炒過幾個月外，年幾以來有跌無升，幾乎炒親都死。
集團早前公佈去年底止中期純利倒退50%至5006萬元，相信係股價低迷嘅主因，管理層聲稱係因為Vista延遲推出，令電腦主機板定單未到。奕達全球市佔率達8%，與東芝等大型生產商有長期合作關係，照計衰極有譜，即使全年業績同上半年相若，現價PE都只係10倍。
另外公司年幾前上巿集資5億銀，去年初仍有現金6億幾，用億幾買廠房同設備後，現金減至5億左右，計落每股淨現金都有0.50元，計埋其他資產拆骨出售都應該唔使點蝕，以1.08元呢個賤價買奕達，分分鐘有意外收穫。
睇多隻工業股奇盛
睇多隻，奇盛（174）都係滄海遺珠。奇盛主業是化工及金屬原料買賣、物業投資等，98年以每股1.10元招股上市，近10年後嘅今日幾乎原地踏步。去年底止營業額22.41億元，增14%，純利7764萬元，升11%，現價PE僅6.1倍，股息9.3厘，被資金睇中嘅條件有齊晒。