星期三，內地股市受加印花稅消息拖累狂插，港股亦受拖累，最多跌280點；新上市的新華文軒（811）亦不能倖免，一掛牌，即潛水，一度較招股價跌近13%，令一眾抽新股的散戶損手爛腳，並在《香港討論區》內成立『新華文軒大插痛哭區』宣洩心頭之痛。
掛牌首日大插水
新華文軒主要喺四川經營圖書及影音產品零售及發行教材等業務，一上市就表演花式大插水，令擁躉Rainrain好𤷪咁話：「點解冇護盤㗎，隻股俾人排山倒海咁沽。」
PearlHk就話一早已經有唔好嘅預兆：「我見到一手中籤率有成六成，冇平時打崩頭得一成幾中，就知道賴嘢㗎喇！但邊會估到佢真係弱成咁㗎啫！」
好彩冇去抽呢隻新股嘅Patsyc就講：「招股嗰陣時，有朋友同我講，話呢隻股有獨特概念，香港未有同類股份，叫我試吓。好彩最後都冇抽，執番身彩。」Joeycky更事後孔明咁批死佢：「如果有咁好景，老早商務印同中華書局就上市喇，所以咪一直未有呢類股份囉！」
輸輸聲唔多老嚟
諸葛不明更懶醒咁話：「話明係賣書，輸輸聲都竟然都敢走去買，自己攞嚟！」Disgust.com.hk仲醒，拉埋時事大局嚟佐證：「近排啲刊物同書籍咁多是是非非，中大學生報同聖經都俾人話淫穢，就知道係凶兆喇，所以我冇抽呢啲咁嘅『賣輸股』。」
YamYamK仲講笑咁話：「呢隻股其實係大陸政府用嚟教育吓啲中國公民嘅書店股，等佢哋知道唔係隻隻股都有得賺，而且仲係中央壓市嘅第5招㖭！」FulunFulun亦認為呢次係個好教訓，等啲散戶知道，抽新股唔係隻隻即日走都實賺㗎。
咪睇小威畀你睇
不過唔知係咪孔夫子保佑，定真係「書中自有黃金屋」，新華文軒第二日就扭轉跌勢，升番2.9%；禮拜五更發威升15.6%，收報6.6元，比招股價高出13.8%，總算有交代，知識嘅力量果然唔可以睇小。
http://www11.discuss.com.hk/viewthread.php?tid=4344903&extra=&page=9