多年不見之玩具K久已旅居美國，大風大雨之日，突然在沙田馬場出現，原來佢聽中貿林講，約左丁山見面，時間要左度右度，好麻煩，不如就趁跑馬碰吓頭，唔使預約。呢樣又係，我哋唔識打波嘅人馬，去馬場風雨不改，臨時碰頭，傾埋生意都得。
玩具K移民美國之後，做玩具入口批發，愈做愈大，人面甚廣，曾支持過一個華裔鄉親競選大城市市長，可惜輸咗，但可見玩具K以第一代移民身份，已迅速打開局面。佢話最近幾年，個個月返香港一行，返得多，索性在香港設立辦事處，請咗幾十人。諗番轉頭，佢當年在港嘅生意唔算大，索性結束之，移民美國，估唔到𠵱家以美國來港投資姿態回來，場面更闊。
此皆拜中國發展迅速之賜，珠三角成為世界工廠，玩具生產正是「多快好省」，又平又靚，橫掃美國市場，玩具K在美國掌握咗分銷渠道，於是返嚟香港建立買貨（sourcing）基地，佢話做得最大嘅係「鬼節」玩具，每年銷量不斷增加，鬼節係小孩玩意，亦係佢嘅發財本錢。
左丁山長期生活在香港，對十月三十一日鬼節冇一手生活經驗，都唔知有乜嘢玩具產品會賣得，玩具K勝在已移民美國多年，知之甚詳，乜嘢古靈精怪用品，佢都掌握到，比香港人優勝不少。記得上個月左丁山應馬主U之邀，到觀塘參觀佢嘅showroom，內裏一切產品似乎甚低檔，冇厘「增值」（valueadded），但好多貨品亦係左丁山以前未見過嘅小玩意，而且銷路極廣。問馬主U：「呢啲小玩意有何用途？」馬主U話：「美國兒童喺復活節與鬼節嘅小玩具也。譬如呢啲七彩假雞蛋就係用於埋藏在學校後園，等學生玩尋寶尋蛋遊戲時，挖番出嚟嘅。你要識得美國生活文化，先至會度到新產品㗎！」唔怪得馬主U與佢嘅公司董事，每年輪流去美國幾個星期參觀考察，其中一位係美國回來嘅留學生。做生意發達，除咗炒貨之外，冇捷徑可走，要好勤力探討市場動向。炒貨易發達啫，亦容易破產。