上星期六本欄講「東院道官立學校」慶祝五十周年，舉辦校友大聚餐，引來唔少東院道官立校友嘅電郵，問去邊度報名，點樣先至搵到陳本漢、何萬森兩位老師，甚至有加拿大讀者（左丁山朋友）告知，一啲東院道官立校友將篇稿電郵到各地，廣泛流傳。為免讀者再問，特登搵咗何萬森老兄，佢話校友報名，可以打呢個電話喎：25608680/25696191找何萬森。
講起校友聯絡，潘啓廸教上Facebook.com，話會有神奇效果，大家可以試吓。Facebook係哈佛校友所創，現在已成為全世界嘅人脈網站。美國啲著名大學極度重視校友網，年年搵校友捐錢，由十蚊至一億美元，大小統吃。此其中又以哈佛嘅校友網絡最廣闊，追蹤校友地址，無遠弗屆。記得以前有一位美國罪犯俾FBI拉咗，線索之一就係哈佛校友記錄之中，呢位罪犯曾有住在阿富汗嘅地址。
與美國相比，其他國家啲大學校友組織就差好遠，主要係校友冇捐款回饋母校嘅習慣，大學唔想嘥錢建立校友網絡，歐洲啲大學生覺得，大學係由納稅人支持嘅，冇錢就問政府攞，佢哋使乜捐錢？久而久之，等到政府喊窮，削大學預算，啲大學就辛苦咯，唯有削除一啲學系，炒晒教授魷魚。如果呢啲事情在香港發生，學生與傳媒一定罵個不休，但係在陶傑筆下文化底子厚嘅英國，居然冇人嘈噃。
美國私立大學，世界排名極高，贏晒歐洲所有公立大學（牛劍除外），皆因美國私立大學有錢，識得搵富豪與校友捐款，又識得投資。辦高等教育，無錢不行，德國法國啲大學怎同美國前十名私立大學爭，正是錢又冇，人才又唔夠，爭乜嘢吖！
校友是否一定要捐款畀母校？當然係人各有志，唔可以勉強。照計行有餘力嘅話，捐番多少，唔使咁計較吖嗎？克林頓做總統之時，佢份報稅表公開咗，原來佢每年捐大約一百美元畀耶魯（克林頓夫婦皆係耶魯法學院校友），數目不大，但嗰份情意，受人尊重。