喺四大會計師行之一安永，做咗超過20年嘅Stephen劉醒雄，最近有新動向，上星期從事林木開採嘅凱暉國際宣佈，委任Stephen做執行董事兼行政總裁，本月1日生效，任期3年，年薪360萬元。
原來Stephen以57歲之齡，喺舊年12月底正式退休，離開安永，吽咗半年之後重出江湖，轉做上市公司管理層。佢做咗會計師超過30年，專攻稅務，以往時不時都有向傳媒講解吓稅務問題，不過早幾年被安永派駐內地之後，就少咗曝光，唔知嘅仲以為佢冇做安永㖭。佢退休前係安永會計師事務所華北地區管理合夥人。不過咁大年紀至轉工，唔知可唔可以適應呢？
Stephen係民主派立法會議員劉慧卿嘅大哥，卿姐都係年近四十至由記者轉去做議員，大哥可以搵細妹指教吓。
[email protected]