每個成功男人背後，都有一個女人，在《師奶兵團》中，三個師奶主角能引起師奶觀眾的共鳴，全憑她們背後都有一個欺騙她的衰佬。而這三個衰佬背後，都有他們的血淚史。
三個衰佬當中，除了謝天華已上位外，艾威和郭政鴻皆是名副其實綠葉王，雖然他們的際遇不盡相同，但都經歷過事業低潮：謝天華曾窮至身上只有五元要捱豬仔包；艾威常遇到讚他好戲，卻叫不出他名字的觀眾；郭政鴻事業正走向升軌，可惜卻婚姻觸礁……但三人對演藝事業同樣抱着永不放棄的決心，靜待機會爭出頭。
謝天華10蚊入行
謝天華近期三戰三勝，憑無綫劇集《女人唔易做》、《迎妻接福》和正在熱播中的《師奶兵團》內發揮小男人本色，成功上位，大有機會成為新一代師奶殺手。
對於師奶殺手的稱號，天華謙虛地說：「我唔敢話自己係師奶殺手，喺我心目中呢個位始終係陶大宇同Bobby（歐陽震華）嘅，佢哋嘅演技深入民心，我從來都冇諗過要做乜嘢殺手，只係希望做到觀眾心目中嘅叮噹（編按：多啦A夢），因為叮噹佢一向好多法寶，佢乜嘢問題都解決到，又可以帶畀大家好多歡樂。」
「我冇易服傾向」
天華慶幸自己出道至今都有觀眾緣，不惹人討厭，所以當天時地利人和，遇到一個好角色，旋即火速上位，他說：「觀眾緣唔可以用錢買，呢啲冇得拉票，不過我唔可以唔承認自己演嘅角色，咁啱係觀眾身邊成日出現嘅小人物，好夠寫實，所以大家先覺得我親切。」
正如《師》劇中扮演鄧萃雯老公方彥祖，因為不堪生活壓力，導致易服減壓，天華說：「導演可能知道我係dancer出身，又唱過吓歌，所以安排我扮演，唯一唔同係我完全冇易服傾向，唱歌跳舞就好似為我度身訂做，我自己都handle到，所以咪可以放膽去演，都冇辜負導演嘅期望。」
回想80年代做舞蹈員出身，天華從沒想過自己會成為演員，他說：「當年我考完會考，自己鍾意跳舞，見到電視台招考舞蹈員，咪用咗10蚊報名費去投考，就係咁吔吔烏入咗行，記得第一次踏上紅館係幫張學友同呂方嘅雙星演唱會做伴舞。」
靠《古惑仔》翻身
雖然曾有機會跟陳小春和朱永棠組成風火海，展現歌舞才華，可是卻未能創一番事業，反而令天華陷入人生低潮，他說：「當時都冇工開，我好記得最窮嘅時候，我刮埋銀包同架車嘅散紙，夾夾埋埋得番5蚊，嗰排我日頭買豬仔包充飢，夜晚要捱杯麵，我猛問自己咁唔係辦法，係咪時候要面對現實轉行？喺呢個十字路口，我好多謝劉偉強、吳志雄同文雋嚟搵我演電影《古惑仔》，娛樂圈真係好講timing，由嗰刻開始，我食正自己嘅運，好慶幸當年堅持冇放棄。」
天華認為藝人要珍惜每個機會，他說：「機會唔係成日有，自己唔把握，下次就未必輪到你，所以每個機會我都一定揸得好緊。」
撰文：比華利
我是誰：舞蹈員扮賤Man上位
現年39歲的謝天華，88年加入無綫做舞蹈員，與郭富城為同學。92年獲許愿賞識，與陳小春、朱永棠組成跳舞組合風火海，推出過兩張唱碟。96年拍攝《古惑仔》系列電影，演技備受肯定。
謝天華曾參與多套無綫劇集，廣為人熟悉的包括：98年演出長劇《真情》飾羅生門、01年演出《皆大歡喜》演薛家燕兒子金月，去年憑《女人唔易做》賤man一角獲提名無綫台慶飛躍進步男藝員，以及今年在劇集《迎妻接福》擔正演賀義。謝天華05年迎娶拍了拖12年的李天恩（Tina），婚姻生活美滿。
