香港股壇有股神，家陣內地有超過一億股民，股神更加唔只一個，話說上周六，喺深圳有家投資企業搞交流會，即講座之類，搵嚟內地三大股神：林園、邱力原、崔偉宏做嘉賓，號召力十足，點知前一日竟然因為反應冷淡而要延期，呢個情況有啲離奇，內地報道話，業內人士認為反映股市大跌後散戶嘅心態。若然講者只係無名小卒，冇人嚟捧場梗唔出奇，但請嚟嘅係林園、邱力原、崔偉宏，佢哋可以話股壇中嘅風雲人物。
先講林園，89年向屋企人湊夠8000銀買股票，獨沽一味買賣隻深發展，三年間就賺咗幾倍，話係因為睇好呢間深圳特區第一家銀行嘅價值；喺03年將資金買重貴州茅台同五粮液，之後三年大賺，上年手上股票市值四億。
入場券1800銀一張
至於崔偉宏大學畢業後喺銀行做過信貸，2000年辭職做職業股民，佢喺18蚊時買咗南京中北，點知隻股一路跌到9蚊，但佢研究後確信自己眼光，捱咗一年，終於喺36蚊賣咗。而邱力原就先從商，賺咗一桶金後先去股壇闖，有說佢喺深圳證交所成立，派第一批新股申請表時，請百人幫佢認購，結果賺咗80萬。
今次個講座，據聞入場券要成1800銀一張，可見佢哋絕對係「貴人」登場，不過對內地嘅散戶嚟講，都唔算咩錢啦，冇人吼嘅原因，主辦單位發言人話，上周三阿爺要大增印花稅搞到個市係咁跌，跟住市場人氣都急跌喇。有證券行客戶經理都話，嗰幾日即刻少咗散戶嚟。睇嚟阿爺呢招有啲效喎。
[email protected]