呢個6月，如果你仲未聽過Walk過Check過MegaBox，我夠膽講句：你一定俾人話Out！而最驚俾人話Out的香港人，請留心聽書：MegaBox是6月7日正式在九龍灣開張大吉的巨型商場。咪以為呢個商場只得名牌時裝連鎖店咁嘢少，佢最大賣點係率先引入呢排日日賣行廣告的12萬呎英國最大家居零售店B&Q；仲有澳洲最大的布藝連鎖店Spotlight亦是第一次抵港開業；陸續登場的還有全港首個國際標準溜冰場、樓底有五層樓高的香港首間IMAX影院，全港首個兒童購物專區MegaKids，全港最大單層書城Popular@MegaBox……咁大件事，你點可以話唔知！
記者：郭佩韻、盧家蕙
攝影：伍慶泉、陳陶鈞、楊錦文
Model：Byron、Tasha、家豪、Kinki
Reporter：Vickie
真係好大，我哋行咗兩日都行唔晒！攰到爆！
Reporter：Abby
Spotlight又平又靚，以後就算搵道具影相都好啱使！
mforMaterials
Reporter'sChoice：Spotlight將深水埗搬入商場
「飯可以唔食，衫唔可以唔買」的女生，係咪睇唔過眼雜誌上貴到離晒譜嘅靚衫呢？就算夠彈藥，身形又未必夠Fit着得落！Spotlight深明此道，設立種類繁多的時款布料、絲帶、花邊及鈕扣，你可以先翻閱雜誌上的靚衫款式，再交畀隔籬的裁縫師幫你度身訂做，買布做衫一條龍服務，手工費由$200-$4,000不等，視乎手工多少而定。換言之，DonnaKaren、DKNY等靚衫唾手可得。
除了Dress&Fashion，香港女生也喜歡自製手工藝品，Spotlight直頭將成個深水埗搬咗入來，如陶瓷彩繪、剪貼簿製作、首飾製作、縫紉刺繡及編織等大量物料任君選擇。小記睇到頭暈眼花，好在呢度環境舒適，地方寬敞又有冷氣歎，總好過大熱天時走去深水埗逼餐死啦！
（Spotlight：23590010）
B&Q自作業做建築師
落手落腳DIY係不少老外的嗜好，喺花園砌間樹屋、狗屋、鳥屋，慳錢又過癮。B&Q就跟足英法連鎖店的精神，包攬晒各式各樣建材，連水電配件亦一應俱全，更體貼地提供埋發電機、電鑽等器材租借服務。若果自己鋸唔到嘅厚重木材，則可使用店內的大型鋸木機，免費畀你鋸頭三刀，之後就要逐刀收費。一磚一瓦都有血有汗，讓你一嘗當建築師的滋味！
（B&Q：36511000）
eforEscalator
Reporter'sChoice：快梯46秒穿3層
MegaBox的建築設計有「全貫通」概念，其中一項主打，是商場內設有高速接駁扶手電梯，橫跨場內四個主題區域。據知，全港最高的商場扶手電梯已被朗豪坊獨佔鰲頭，不過最快電梯似乎名花未有主。今次MegaBox就擁有3條快速扶手電梯，分別由1樓到5樓、5樓到8樓以及8樓到10樓。
究竟有幾快？小記親身試過，感覺比一般電梯快少少，由低層上到去高層，個速度有幾快唔易Feel到；但由高層落低層就好明顯，尤其係聽到扶手電梯發出「隆隆隆」嘅聲響，未落到嚟已經俾聲音嚇親。尤其是由高處往下看，電梯移動超快，唔扶住個扶手真係會有少少驚。一家大細去行MegaBox，提提你搭快速扶手電梯時記得拖緊小朋友！
gforGarden
幫你起空中花園
小小的盆栽，可為平淡的家居增添色彩。第一次空降香港的B&Q，與一般家居店不同之處，就是率先設有園藝植物及室外家具專區，讓客人一站式挑選植物種子、花盆、肥料及園藝工具，綠化家居自然輕鬆簡便得多！
除了小工具，這裏更提供埋大型剪草機租借服務，可惜小記家中沒有綠草如茵的大草坪花園，放不下椰子樹、太陽傘及BBQ爐，呢啲富貴嘢留番畀上等人用啦！我用剪刀修剪小盆栽就夠了。
aforArt
藝術區爭位影相
新開商場多會擺放藝術品供人欣賞，MegaBox都唔例外。商場在未開張前，已經往世界各地挑選不同的藝術品，擺放在場內點綴，目的是要表達到MegaBox這個商場名字的含義。官方稱𠵱家暫時只有3個作品供一家大細欣賞及影相，日後將陸續增添更多藝術品作擺放用途。
今次揀出的藝術品出自內地藝術家唐勇，其中一個《我與你的對話》曾得獎無數，包括2004年榮獲第三屆重慶市美術作品展覽三等獎，多次在國內外各類刊物上發表，並入選第十屆全國美術作品展，頗有名堂。藝術品背後的意義喺自我想像完之後，記得要好似小記咁同每個雕像都影張相，因為它必定成為全場影相熱點，而且第日可能不斷更新藝術作品，唔影就走寶啦！
BOX=TheatreBox
包廂試清高中低音
座落MegaBox消閒生活專區內的「香港最好電器」旗艦店，佔地約4萬平方呎，除了傳統電器電子產品外，新店特別劃分了多個專區。不可不提的是特設的頂級「家庭影院專區」，將家居提升成為豪華私人影院，畀足你星級的視聽享受。呢度仲設有「高科技喇叭音響系統專區」，網羅各地名牌音響產品，置身其中，十足藏身於一個頂級的TheatreBox，高音甜？中音準？低音勁？仲點會分唔清！
店內還特設具備高清顯示器材的電視機專區，足夠畀你慢慢揀，迎接年底的數碼電視廣播新紀元。另有顧客休憩區，畀你在閒適的環境中，慢慢挑選及欣賞各種先進電子產品。（Best電器：27574263）
David：「MegaBox個範圍好大好闊，好好行，而且商舖同食肆都多，放假行街揀呢度一定可以消磨一整日。」
Connie：「雖然今日開得3間店，已經夠我行成日！印象最深係Spotlight好多DIY配件，穿手鏈同整公仔嘅材料好齊全。」
Joanna：「B&Q可以買到好多園藝植物，感覺好新鮮！不過裝飾物都係去Spotlight買比較有得揀！」
Terry：「貪得意睇完IKEA，見有車坐過嚟咪睇埋B&Q同Spotlight囉！B&Q好似平過IKEA㖭喎！」
Donald：「B&Q的窗簾布掛起晒可以慢慢揭來睇，好方便，睇到我眼都花，好過返大陸做啦！」
黃小姐：「其實只係想睇燈罩，點知呢度咁多嘢睇，行咗45分鐘只係睇咗四分一咋。」
