報紙報道內地散戶來港開戶口炒股，令到細價股升到飛起，因為內地散戶食慣股價升幾倍、十倍嘅大茶飯，要佢哋買滙豐、中移動，講笑咩。
於是打電話問吓經紀M：「係唔係有好多散戶來自內地呀？」經紀M答：「應該係，好多行家開戶口都開唔切，生意好到極。不過我哋就特別小心揀客，來自內地嘅新客戶唔係咁多啫。」如何小心呢？經紀M話佢曾經應邀到一間金融機構向內地客戶講如何投資香港股票，又介紹一啲港股基金，分保守、平衡、增長三大類。啲內地客唔耐煩咁問：「講咁多嘢做乜呀，增長基金一年有幾多回報先？」經紀M答：「增長基金有風險㗎，目標係十五巴仙回報率。」內地客哄堂大笑，一位舉手問：「十五巴仙，要嚟做乜，不如你介紹一啲股票，一年起碼可以升四至五成嘅。」經紀M邊度敢推薦呀，幾乎被人噓走。
又有一位內地人問：「不如你教吓我哋點樣做老鼠倉吖！」經紀M為之一窒，佢間行管得好嚴，合規部昅得好緊，邊會開老鼠倉呀，唯有答：「我唔識。」內地客話佢冇料到，嘥時間，唔再發問，於是經紀M有啲狼狽咁鬆人。
經紀M之所謂揀客，就係唔敢要呢類內地客戶。實際上，內地QDII仲未引起內地股民興趣，A股咁吸引，邊會有人唔買A股而買QDII吖。靚女L有親戚在內地開咗一個人頭戶口，八個月前投資三十萬買A股，最近升到三百萬，佢賣番一啲出去，攞番五十萬現金，穩賺不賠，然後睇住啲股票日日升一個巴仙，笑到四萬咁口。靚女L警告佢：「會跌番落嚟㗎！」親戚話：「𠵱家話知佢啦，跌一半，我都賺一百五十萬，一於放紙鳶，賺到盡為止。市場上有好多人學我咁，一於唔賣番出去，新入場嘅炒家要買，唯有出高價搶。」呢個係A股猛升嘅原因之一，外資見到呢啲現象，唔同你癲，一於㩒住荷包唔買，故此QFII冇乜人有大興趣，到個市真係跌咗，啲QFII先至會郁手入貨。