香港股市企穩20,000點，內地A股日日創新高，特別喺大陸，成億散戶前仆後繼撲入股市，搞到港交所主席夏佳理都好緊張，事關大陸冧市，香港股市都難以獨善其身，好大機會要陪葬。
佢噚日出口術勸喻小股民，唔好以為投資好簡單，賺錢話咁易，因為唔係人人都蝕得起，要適可而止，千祈唔好「玩得咁盡」！
夏佳理噚日接受電台訪問，講回歸後股市表現，雖然唔少人對2000年科網股泡沫爆破記憶猶新，不過佢話印象最深刻嘅，始終係73年嘅大股災。當時恒指由1,700點跌到150點，成個市冇咗超過九成市值，真係屍橫遍野血流成河，所以投資真係要審慎，佢希望大陸股民唔好以為賺錢好簡單。不過利字當頭，呢啲說話有幾多人聽得入耳？