2007年係回歸10周年，仲係星戰誕生30周年，對於我，星戰生日比回歸更興奮，摷吓星戰嘅舊Product放上網炒都有望賺吓錢。唔好話我市儈，既然講到癮起，一於搜尋10款炒到飛起嘅星戰產品，吓！今次當炒竟然係二打六角色贈品，仲有價有市㖭！
記者：區佩嫦
部份攝影：陳陶鈞
鳴謝：星戰華人網及帝國軍第五零壹旅駐香港幻影部隊
Top1
二打六沙兵贈品成無價寶
炒得最勁的絕對是「非賣品」莫屬，好似這個鍍了金及銀的沙兵半身像，是生產商GentleGiant於2004年特意生產，送給有生意往來的公司作聖誕禮物之用，只發行200個，你話幾矜貴！由於當時只係禮物，無公開發售，屬於「無價寶」，加上數量少，現已炒至約HK$7,410。
Top2
茄喱啡怪獸變主角
呢個係《星戰前傳3》曾經「咬死」C-3PO的二打六怪獸SalaciousCrumb，炒幅同樣無從估計，因為呢個Figure都係2005年GentleGiant送給友好機構的聖誕禮物。雖然同款有出產普通版，但普通版就沒有戴聖誕帽及掛上聖誕燈飾，所以呢個限量200個的聖誕版特別矜貴。
Top3
變身PressKit 拆盒個價即跌
除了為節日而生產的禮物，玩具展的PressKit亦有炒賣價值，好似呢個由「孩之寶」生產的贈品，專送給當時出席玩具展的傳媒朋友。
正面睇可以見到AnakinSkywalker的3吋半公仔，打開左邊的盒蓋，Skywalker便「變成」DarthVader，正好代表着《星戰前傳3》。雖然發行量不詳，只知道係限量版，但Packing夠特別，星戰迷好Buy。
Top4
首款卡版Kubrick
這款BapeGalleryCardedKubrickBobaFett是第一款包裝在卡上的Kubrick公仔，對Kubrick迷和星戰迷而言好有價值。
呢個Kubrick是生產商於2003Mecidom日本玩具展送給獲邀的嘉賓，至今仍恨死唔少星戰迷。
Top5
特別破膠Packing
於2002年紐約玩具展中獨家發售的DarthVader3.5吋人偶，係廠方NumberOne玩具，當然較值錢。
Packing幾搞嘢，DarthVader支激光劍穿吸塑膠而出，邊個夠佢型！
Top6
會場版二打六炒8倍
2003SummerConvention的會場版CloneTrooperLieutenant半身像，又係二打六的角色，一樣炒得起。全個以樹脂黏土製成，限量1,000個，當時售價為US$50，𠵱家已經炒起8倍，由此可見只要手工靚，唔係主角一樣受歡迎。
Top7
黑武士半身像
星戰的icon係DarthVader，但「炒市」竟然跌到第7位。呢個由GentleGiant生產商於2002年推出的黑武士半身像，手工夠晒精細，雖然限量發行3,500個，但無想像中咁炒得！
Top8
手工超靚
又係二打六喇！其實都有唔少人Buy，好似呢個GentleGiant於2003年推出的BobaFett半身像咁，由於手工及上色都做得超靚，雖然推出了7,500件，但一樣炒得起！
Top9
太空戰船
LEGO是其中一個會推出星戰玩具的生產商，雖然唔知每款產品的發行量，但勝在啲貨出完就唔出，賣晒就賣晒，所以都有炒賣價值！這款2000年推出的StarWarsEpisodeIIRepublicGunship，話佢特別就絕對唔係，不過可能個款受粉絲歡迎，所以炒價先咁高。
Top10
全城失望 激光劍只升1倍
講咗咁耐星戰，無理由唔提激光劍，呢把MasterReplicas推出嘅Elite版Skywalker激光劍，用料勁靚，好有手感，推出時只限會員先可以上網訂購，限量750把，市面真係絕無僅有，當時個個以為係無價寶，可惜，佢只係升1倍，要再升？等40周年喇。
炒星戰一定上ebay
據星戰華人網網主阿一話，要搵炒得起嘅星戰Item，一定要上網。「要搵炒嘅Product，一定要上eBay，款式又多又齊。」不過炒得起都係矜貴貨，絕對係可遇不可求。
以阿一的經驗，星戰產品要炒得起，一定要符合三個要求，第一係數量，最簡單的物以罕為貴理論，越出得少越貴，當然有啲係生產商送畀合作夥伴嘅特別版或者會場版嘅就特別有價值；第二是款式，好似人人都鍾意嘅Skywalker或DarthVader就自然受歡迎，呢啲產品可以多留意：第三是質素，雖然話主角多人Buy，但有啲二打六角色，手工和色都做得好嘅話，都可能會突圍而出。
星戰News
想知道星戰的資訊或即將出街嘅產品，有兩個正網可以推介：星戰華人網（ http://www.starwars-hongkong.com），有齊電影、產品等資訊，星戰迷必蒲嘅網站。
另一個帝國軍第五零壹旅駐香港幻影部隊（ http://www.hk501st.com），係班鍾情玩白兵Cosplay嘅星戰迷竇口，呢個帝國軍501旅喺星戰前傳中出現過，係跟隨DarthVader攻入JediTemple嘅獨立軍，所以想知星戰最新嘅資料，都要嚟呢個網頁浮游吓先得。
想炒30周年版玩具 記得Keep包裝
話晒今年都係星戰30周年，點會唔出啲30周年紀念版慶祝吓，順便搶吓錢。30周年版嘅星戰產品，其包裝全部都統一晒，黑底白字印住STARWAR，仲有30嘅字樣，唔拆Packing分分鐘都炒得起。
