隔咗兩個幾月，歐洲國家盃外圍賽喺今個球季完結之前再踢多兩輪，先至畀班國腳去放假。
今晚戰火重燃，我推介A組比利時對葡萄牙一仗畀大家。𠵱家排行榜形勢，除波蘭一支獨秀外，跟住喺後面嘅葡萄牙、塞爾維亞同芬蘭都咬得好緊。至於排第5嘅比利時，近年喺國際賽成績未如理想，通常分組賽已經行人止步；𠵱家6場分組賽只係贏過「大魚腩」阿塞拜疆同阿美尼亞，入球又少，得4球。冇計啦！踢咗咁多年，前線仲係靠伊美梅賓沙，其餘熟識嘅球員就剩番拜仁中堅雲拜頓同拉素中場穆汀加爾，試問呢啲人腳同實力有咩睇頭？
雖然對手葡萄牙喺分組賽作客都唔算好，至今仲未開齋，勝在攻力強勁，6場已經入咗13球，平均每場入兩球以上，係現時A組之冠。葡萄牙班球員質素毋庸置疑，加上教練「大菲」史高拉利經驗老到，善於戰術運用，首循環喺主場已經清風送爽贏比利時4球，今晚作客唔需要貪心，齋贏就夠啦！
PHONE波熱線：1831678
（開放時間：今日9:30pm至明日4:45am）
阿鵬
有線球彩台主持
電郵：[email protected]