「迷」這個字有很多解法，迷人、迷信、迷惑、迷途等等，阿Ken陳啓泰就差不多將公餘時間放晒落車上，除用「迷」來形容，更可說是「癡」！「其實我十幾歲就對車發晒燒，因為揸車對我嚟講，本身就係一種興趣、一種享樂。」雖然阿Ken嫌尾轆車易甩尾危險，但今日試完呢架RX-8之後，登時改觀，臨別時仲話考慮買番架！咦，係咪最後答案？
文：TigerL 攝影：伍慶泉
初試MazdaRX-8
相約阿Ken試車，小記跟他說是RX-8時，便一口答應：「好呀！我都未揸過，都想試吓！」拍攝當天陽光普照，可說是非常順利，阿Ken駕駛RX-8的第一感覺，便是舒服，「呢幾年人老咗，對舒適要求亦都高啲，而RX-8車廂空間比想像中闊落，起碼冇頂頭（阿Ken算高人一族），而呢架RX-8後座空間唔錯，可以坐到人，比起好多辣跑嘅DogSeat已經好好多。」
阿Ken亦大讚佢有歐洲車水準，「唔似一般日本車，好歐洲車Feel，車架夠紮實。你知啦，RX-8車門係對開設計，冇咗條B柱，成個車架可以話係中空，咁嘅情況下行車感覺仍然好紮實、好剛性，實在難得。」
扭力充沛略嫌跳動
RX-8可算是萬事得重點力作，除對開式車門設計夠創意，還有雙轉子引擎帶來的250匹雄渾動力，而喺試車初段15分鐘，阿Ken亦已感受到RX-8威力，「馬力方面比我想像中好力，因為之前聽過好多Comment，話要高轉先有力，但係我𠵱家都係Keep住3至4千轉，中段扭力已好好，一畀就去，毋須上到6、7千轉，以咁大架車嚟講，扭力算OK喇！對於一架1300c.c.車嚟講（正確係654c.c.×2），表現非常好。」雖然RX-8的c.c.不算高，但萬事得確實下了功夫，令其馬力或扭力有上佳之表現，始終RX-8是部跑車，所以Setting亦以跑車化為依歸，行車時會略為跳動，「論路面感，跳動係多咗啲，但係因為車架夠紮實，所以影響唔算大。」
選擇玩伴 後轆免問
原來阿Ken買車有個先決條件，就是不會買後輪驅動的車（即FR）和一定要手波，喜歡手波車也可理解，阿Ken就拿相機作比喻──真正喜愛攝影之人，會用Manual機多於全自動儍瓜機，因可帶嚟更多玩物空間，令樂趣大增。只喜歡四驅車及頭轆車，其見解蠻有趣，「好耐之前揸過尾轆車，但我一定揸唔掂，唔係唔得，要學囉，因為尾轆車技術要求比較高，香港又成日落雨，我有啲揸開FR車嘅朋友，唔多唔少架車都碰撞過！Touchwood講，尾轆車碰撞嘅機會始終比較高。」事實上現代車壇科技日益進步，尤其在安全性上，像萬事得RX-8嘅安全操控系統（DSC）、限滑差速器（LSD）、四輪防鎖制動系統（4W-ABS）、電子制動分配系統（EBD）等等之科技，其實只要小心駕駛，任何車也可以很安全。
RX-8有好有壞
「舒適性我會畀RX-880分，因車身較大空間較多，舒適度自然提高，不過我認為細番15%更好，靈活啲！馬力同扭力我好滿意，亦值80分以上！」有讚當然亦有彈，「低扭係轉子引擎一大弱點，始終副偈比較細，3波2千幾轉想扯番起比較難，點都要3、4千轉先起到。電油同偈油消耗亦較大，事關轉子引擎要大量偈油嚟潤滑副偈，出廠嗰時都講明係燒偈油，所以揀得佢，就要勤啲打理佢。」雖然RX-8未必是阿Ken的杯中茶（始終是尾轆車），但就整體表現，亦令這位車癡有不俗評價，可能有朝一日，阿Ken會因RX-8令其對FR車有所改觀，重新燃起其對尾轆車的愛慕之心。
4人同跑RX-8
早年Mazda推出雙轉子引擎（RotaryEngine）時，以雙門雙座位跑車為主，到了RX-8卻大轉變，改用4門4座位設計，後座更闊落得可讓兩人舒適乘坐，所配用的引擎更是全新設計的RENESIS雙轉子型號，單是馬力輸出已達250匹。
雙轉子引擎的賣點是引擎容積較小，但勝在可榨取強大馬力，輸出幾近直迫較大容積（如3,000c.c.V6）的引擎，但可惜耗油量也相對地較高。
MazdaRX-8規格
引擎：654c.c.×2
馬力：250ps/8,500rpm
扭力：22.0kgm/5,500rpm
傳動：6前速手波，後輪驅動
售價：$398,800
查詢：萬事得汽車（28931112）