可算最受機迷歡迎嘅賽車Game《GT》系列，全球總銷量超過4,680萬隻，鍾意揸車又鍾意打機嘅，唔會未玩過！PS3嘅《GTHDConcept》免費任人下載試玩，但一條賽道加10款車，根本止唔到癮，機迷個個催SCE快啲出《GT5》。
最新消息，根據法國雜誌《JoyPad》最新訪問GT之父山內一典嘅報道，居然爆咗唔少料出嚟，堅料包括新作有齊《GT4》50條賽道同700架車，即係尖沙嘴彌敦道將高清重現！最正係攞正法拉利版權，由新到舊款型號全部落齊，最最最緊要係終於加入損壞系統，所有車都炒得爛！
行行吓會落雨
就咁睇牌面已覺《GT5》有排操有排玩，內容豐富正正可發揮Blu-ray嘅超大容量優勢；至於Cell處理器嘅運算優勢，可從另一新加系統「天氣變化」嚟印證，遊戲賽道及賽車本已佔用大量貼圖及物理運算資源，若行行吓天晴變落雨，所有物理數據登時唔同晒，處理器同顯示晶片弱啲都頂唔住！此改變的確令遊戲更刺激同襟玩，尤其玩雪地泥地嘅越野賽，又或幾十個圈嘅耐力賽，唔及時適應天氣改變揸法，分分鐘跌番落包尾！
其餘新增系統包括更多駕駛視點，如見到中控台嘅車內視點，幾百架車全部唔同，開發組肯定砌3D砌到叫苦連天；網上對戰更激增至20架可同場較量，以PSN免費對戰平台嚟睇，到時肯定個個劈車劈到日月無光！
記者：徐影龍
