國際賽雖然唔係我嘅強項，但希望食住個勢，延續本欄7連勝，呢期一於向大家推介愛隊荷蘭，可以喺今日嘅友賽擊敗主場南韓作重心；大家早場贏到錢，其他咪當風流波小注怡情，或者夜晚睇場戲囉，好過成晚「哺」喺屋企賭埋呢類無謂嘅國際賽。
小弟有幸為〈蘋果開倉〉頭條執筆，經過兩個月來苦戰，上個禮拜乘勁勢連場報捷下，目前有近3,000分即約6%嘅純利，呢個版去到月尾西甲歇暑就會暫時休息，希望呢條長勝路幫讀者搵到唞暑費，來季英超再玩過！
荷蘭鋒線孖寶夠殺
今日冇場波有好大信心，不過千挑萬選，都係捧荷蘭最安心；主場嘅南韓雖然以鬥志見稱，但近5場只係得1勝1和3負；加上佢哋呢場未能「夫添」，一對喺英超效力嘅中場朴智星同埋薛琦鉉都因傷缺陣，面對質高嘅荷蘭，相信難逃一敗。
荷蘭今次亞洲之旅（下周三作客泰國）亦唔係派出最佳人腳，好似門將雲達沙同埋中場施多夫都冇隨隊，而後衞保拿奴斯同中場洛賓等則因傷缺陣；不過佢哋勝在質高，好似利記前鋒古積特同阿積士射手亨特拉爾咁，相當夠殺。另外值得留意嘅球員，係首次入選嘅施洛尼，呢名精英隊前鋒射門觸覺敏銳，走位又好，隨時靠今役上位。馬會開出「讓球主客和」，個「客勝」有成4倍以上，莊家要你諗兩瓣，咁你咪一注單頭賭兩倍W，另一注博懵玩「客勝」咯。贏咗錢出街睇場戲涼吓冷氣好過；不過講睇戲，我建議大家咪對「魔盜王3」有咁大期望，悶場太多，我就瞌咗3次眼瞓嘞。
丹麥上盤有「典」故
其他心水，丹麥迎瑞典呢場北歐大戰，如果兩隊「夫添」，瑞典可略為秤高，不過呢場偏偏瑞典傷兵滿營，好似後衞艾特文及中場卡斯唐咁都因傷缺陣，就算有伊巴謙莫域復出都制唔過。反觀丹麥，佢哋新星如前鋒賓特拿及有「丹麥鄧肯費格遜」之稱嘅射手拉斯慕臣等，質素甚佳，加上老將如前鋒湯馬臣及格朗基亞仍然當打，今場仲有主場之利，一於去馬捧丹麥上盤。
博懵買個德國對聖馬力諾6球，有成5.9倍，信吓莊家眼光開唔到7球或以上個「大」。
重心出擊
主客和
荷蘭W
蘋果波神
狂迷英國波，尊崇雲格；成與敗，視乎你是否找到真快樂！