關榮建的試驗農場，四處掛着閃閃反光的雷射唱片。「用來趕啲雀㗎！」隨手摘下幾顆嫩紅的士多啤梨遞給記者，唔酸喎，不過都唔甜就真。關榮建像看穿記者的表情，「咁算成功咗一半喇，要由頭學起」。看着滿園繁繁雜雜的芹菜、油墨菜，養雞幾十年，因為禽流感，關榮建最終還是交出雞牌。看着附近的農場變成地產發展商的葡萄園，他狠下心腸跟六萬呎雞場說再見；幾十歲人了，這一年，他重新起步，由士多啤梨開始。 記者:張嘉雯
農場很偏僻，記者的車跟着關榮建，走呀走，迂迴曲折，大路駁小路，然後是一幢幢別墅式住宅，路口站滿西裝友，拿着售樓書，走到馬路攔截車輛，介紹他們口中的葡萄園。
全港雞場剩41個
車停在農場外，很多狗，大群大群，遇人即吠。關榮建揮揮手，掃走摺枱上的蒼蠅，招呼記者坐下，拿着一瓶礦泉水，大口大口喝下，「我老竇嗰代就開始養雞，我11歲就跟住做，幫啲雞斟水鏟雞屎，15歲開始自己養，當係終身職業。」
97禽流感，我們無雞食，他們以為殺了過百萬隻雞就看到出路。結果十年間，零零星星的爆發，停停開開，開開停停，他們幾乎無飯食，「咁樣爆嚟爆去，售價好大波動，好似計時炸彈咁，我哋好難生存。」
「禽流感嘅時候，我哋最低潮，冇得講價錢，啲雞根本冇人要，政府肯買起晒，都好過擺晒喺度，有啲同行仲要賣電器、揸的士幫補。」直至02年出現供雞隻注射的疫苗，業界以為是一線曙光，結果「得個桔」，「當時諗住雨過天青啦，原來唔係，呢幾年明明控制到，啲專家又係咁講話香港唔適合再養，真係好唔忿氣。」
「好多人都交咗牌喇，捱唔住，香港，冇晒農業喇。」關榮建說，三分之二雞農已交回雞牌，全港雞場只剩41個，說着指向身後大片山巒，「有啲行家清咗個場，賣畀新鴻基。成個場三萬呎，由嗰邊軍營一路起，前面啲豬場全部攞晒嚟起樓。香港house少、apartment多，呢度近邊境，啲人大陸有生意，就會買呢度。」
「睇住雞大似湊仔」
「我哋以前好風光，賣過年雞，年廿八高峯期，全新界周圍都係雞車，捉雞嘅人三日唔瞓覺，年卅晚亥時收工，初一子時開工，全年無休。平時好得閒，唔使好似打工咁朝九晚五，好自由。」關榮建說，09年中香港街巿將再沒有活雞，他自己也在今年四月起轉營室內種植，主攻水果蔬菜保鮮工作，還打算種植好多士多啤梨。
「政府不嬲唔支持農業㗎啦！農業其實係好大學問，只係香港咁唔睇咋。做雞農諗住做一世，估唔到40幾歲就要轉行，都冇話後悔嘅，去到乜位置都係求生存啫，呢行都曾經帶畀我歡樂嘅時光，睇住雞大好開心㗎，好似湊仔咁。」
【回歸10年倒數29日】