歐國盃外圍賽，丹麥對瑞典，兩隊都曾經係冠軍級球隊，可惜青黃不接。我睇好邊隊？當然係丹麥！
先睇積分榜，𠵱家只打咗4場嘅丹麥，我認為仲有得博。講球員級數，有啲當年贏冠軍嘅影子，大部份都係不知名嘅球員；不過，丹麥依然能夠打出好有效率嘅足球，老將有維拉利爾嘅湯馬臣，較為有名嘅就係利物浦嘅丹尼爾艾格；而最重要嘅贏波條件，除咗主場之外，對手瑞典近況差！雖然瑞典排喺第2位，可惜，連埋啲國際友誼波，近6場1和5負。
另一場友誼波，我就會瞓身美國贏中國，中國隊完全係差到唔可以再差，「主客和」冇肉食，要「讓球主客和」嘅「主勝」！我諗連嗰啲自稱愛國嘅人士，都可能會估美國贏波。
最後，我最有心水嘅，就係法國對烏克蘭。兩隊自從世界盃開始，前鋒都鬧入球荒，法國近4場都係入球「細」，烏克蘭就近5場入球「細」，呢場波仲唔係又開「細」？
周鵬
商業1台《球迷集中贏》主持
電郵：[email protected]