開張14年嘅麗嘉酒店，大業主麗新林建岳決定重建後，噚日宣佈做到今年除夕就閂門，中環名人飯堂又少一間。麗嘉同立法會大樓只係一條馬路之隔，喺政府總部搭車去只係幾分鐘，所以好多高官、議員鍾意喺個度飯局，食晏時候行入酒店中菜廳麗嘉軒，撞口撞面都係議員局長，好旺場吓。
開倉拍賣酒店用品
除咗中菜廳人氣勁，麗嘉間意大利餐廳Toscana仲巴閉，近年搞百萬元白松露宴成為全城焦點；另一噱頭之作係TheChaterLounge推出8,888蚊兩位嘅超豪hightea，唔好以為成萬蚊飲餐下午茶冇人幫襯，有唔少闊佬慕名而至。
名店多名人幫襯，唔多唔少有啲八卦逸事流傳，麗嘉都唔例外，舊年8月香港小姐比賽當晚，有客人包房食飯，點知隔籬房有把類似煲呔嘅聲音，話不滿電視機聲浪，要求校細聲部電視同唔好咁嘈，煲呔否認有咁嘅事，呢個「港姐噪音」風波，至今懸而未決。
酒店公關話為多謝擁躉支持，會搞告別活動，亦可能將啲酒店用品、傢俬開倉拍賣，以慰fans思念之情，詳情稍後公佈。