公共事業尤其係運輸業，一提起罷工肯定令人叫苦連天，但係最近日本某個運輸業員工罷工，居然搞到個個車主叫好，仲希望佢罷耐啲，最好罷一世㖭！
事緣係日本神戶市一條連接市中心同西部嘅西神戶收費公路，因為負責管理收費嘅公司業績惡化，由4月起拖欠員工薪金，於是員工發起罷工，搞到收費亭無人開工收錢。公路公司喺無計可施嘅情況下決定罷工期間免費畀所有車輛直行直過。
罷工呢招果然有效，因為公路公司「神戶市道路公社」見管理收費嘅「大清道路管理」搞咗個大頭佛出嚟，仲累佢哋唔見一大筆，除咗向該公司追討賠償外，仲馬上終止合約，而原有嘅員工仲獲安排喺新簽約嘅管理公司度繼續工作，好一個惡有惡報嘅大團圓結局！
悠穎馳
豪邁不羈，愛車如命，聽幾下引擎聲就知咩車！