上個月擂台諗住同蘋果波神爭個1哥位，點知老友賴恩一個屈尾十中條2串3波膽，破晒歷來擂台最高積分紀錄。我唔知佢自己有冇買吖，如果冇買嘅話肯定揼爆。
不過，聽講賴恩呢幾日去咗馬交食葡撻，有錢去賭場搏殺，睇嚟梗有啲嘢。既然佢咁有見地喺我西甲地盤中波膽，我惟有送首近期至愛嘅歌《淘汰》畀佢：「只能說我輸了……只能說我認了……」
收拾冇份做盟主嘅心情，學蘋果波神話齋「要為讀者服務」，今期推介斯洛文尼亞對羅馬尼亞開「細」，女性朋友黃獅虎話嘅！
大細：斯洛文尼亞「細」
心得：黃獅虎呢期鍾意「細」
畢傑
畢傑愛肥仔，所以最愛朗拿度；但更愛賭波，不倒翁最似我。