中國社保基金，由中央到各地方政府都有，總理話社保基金係中國人民養命錢。學者認為所有社保基金，用payasyougo嘅方法，遲早出事，因為當今世界，除咗發展中國家（即係窮國，我地講政治正確，唔用窮國poorcountries呢啲名詞）之外，其他國家，包括中國在內，出生率不斷下降，而且人嘅壽命不斷延長，人口老化，慢慢地呢個社會就變成老年人多過青壯年人。換句話說，向政府社保基金要錢嘅人士多過向社保基金供款嘅人士，整個制度會破產。講咁多廢話，八個字講晒，就係：「生之者寡，食之者眾」，幾十年前啲精算學家冚扮爛計錯數。
聽大教授講，中國厲行一孩政策（最近廣西博白縣騷動，因一孩政策而起），冇錯係可以控制人口增長，中國人口預料到咗二○二五年達到高峯，以後人口逐漸下跌，老化速度大，中國嘅社保基金制度備受考驗。
其實一孩政策帶來好大社會問題，農村殺女嬰，屢有所聞，中國人之無後為大觀念，再過一千年亦洗刷不掉，於是中國會變成男多於女，男士做基民嘅機會大大增加。共產黨官員愛互稱同志，他日中國好可能係男人互稱同志㗎！
大教授好好諗頭，佢話將一孩政策改為一男孩政策，就可以解決好多問題，而且合乎中國傳統觀念，締造社會和諧。左丁山不禁拍案叫絕，如果胡溫推出「一男孩政策」，全國人民必定三呼萬歲。
「一男孩政策」就是每對合法夫婦可以有法律權利生下一個男丁，如果太太連續生三位千金（好似林超榮太太咁），佢哋想嘅話，可以繼續追落去，直至生到一個男孩子為止。如果老婆一索得男，咁就叫停，換言之，如實施此政策，中國未來有好大機會增加不少女性，平衡性別比例，但同時可以防止人口增長過快。過了若干時候，當中國人均收入夠高，生育嘅機會成本大大增加（例如德國、法國）人民自然會降低生育率，到時就可以取消人口生育政策嘞。