早排悠穎馳講過話有種汽油代替品叫做生化燃料（Bioethanol），即係用植物嚟提煉嘅燃料，仲講過話日本方面會大力發展，預計三年之內全國油站都會供應呢種新能源咁話。
不過話口未完，嗰頭已經有人唱反調，世界著名環境學者LesterR.Brown喺一個論壇上公開佢嘅意見，話將食物轉化為能源嘅話，會令食物價格上升，更加會加重貧窮國家嘅負擔，糧食不足問題會更加嚴重，佢更呼籲要停止興建生產生化燃料嘅工廠。
悠穎馳才疏學淺，初初都覺得將食物轉化為能源呢個概念非常之好，之但係經呢位大師點醒之後，家陣都覺得新能源存在唔少問題，即係話有錢國家分分鐘為咗得到更多能源作享樂之用，而將珍貴嘅食物變成燃料，令到無錢嘅國家饑荒問題更加嚴重！所以對抗能源危機嘅實際解決方法，始終都應該向節省方面埋手，而身為車主嘅你同我其實都應該要盡一分力。
悠穎馳
豪邁不羈，愛車如命，聽幾下引擎聲就知咩車！