人哋話我悠樂祥風流瀟灑，有幾分似荷李活明星JudeLaw，仲以為只係𠱁我開心，點知上星期去日本沖繩島，在美國村逛到攰時，喺24小時老麥內，竟然有兩個日本妹主動向我搭訕，仲請我食三角朱古力批呀！
「你是中國人嗎？」雖然呢句開場白行咗少少，但我都好有禮貌咁答佢係，仲係香港人，點知兩個就𠵱嘩鬼叫，猛話「殊該兒」，即係話我勁呀！原來外間千秋同金城翼係沖繩著名中學球陽中學的高中生，學過吓國語，見到我就想show吓quali，講講吓忽然念起詩上來：「夜來風雨聲，花落知多少」，孟浩然《春曉》呀！唔知有冇寓意呢？佢哋仲話要盡地主之誼，請我食沖繩麥記新口味「三角朱古力批」，100日圓啫，未食已經甜到入心！不過，以示風度，我亦帶咗佢哋到附近間吉之島，請佢哋食山口園綠茶軟雪糕，都係100日圓，好好味，連佢哋都話唔知，多謝我嘅好介紹喎！
200日圓就識到兩個可愛日本妹，真係有賺！
悠樂祥
酷愛旅遊，搭飛機多過搭巴士，天生樂天派。