近年油資充斥，連港府財金官員都走去中東推介香港，招攬油國王子嚟香港訪問，可見呢個市場越嚟越受重視。
阿聯酋航空中國、香港及東北亞區域總經理劉榮柱噚日見到華華，就呻喺香港好難請到啱嘅空中服務員，一年都請唔到幾個。成間阿聯酋航空有8000個空服員，識中文嘅只得80幾個，當中香港人可能只得十幾個。
華華好奇怪，照計香港人英文水準有番咁上下，國泰航空今年都計劃請900幾個空服員，阿聯酋航空冇理由請唔到。
劉榮柱解釋，公司有過百個國籍嘅員工，空服員真係要英語好流利先至掂。咁又係嘅，有咁多石油王子、富商坐阿聯酋航空，啲空服員質素冇番咁上下又點得呢，若果激嬲啲超級大豪客就認真大件事。